Tommaso Campanella, De sensu rerum, p. 34
ut frumenti, in cuius grano est frumenti forma quam edit actu
cum
terrae seminatur. Stulta fallacia: Semina enim non sunt pura materia,
sed decisio
omnium causarum: ergo habent ideam generantis
ac virtutem actu licet ligatam in
materiae densitate: Quae excita a terrae
calore et mollificata eius densitate, ipsa
virtus vigorem sumit operandi,
et quod in generante faciebat, faciendi, ideoque
molem ad sui
principij similitudinem effingendi. At in osse, in lapide, in pluma
non
fit forma frumenti, quoniam non habent intus virtutem frumentariam.
Et
quidem ex quolibet quodlibet oriretur, si a materiae potentia
et non agentis
emitteretur forma. Et fabulosa est stultitia, quod
de materia incorporea, ut ipsi
dicunt, educatur magna mundi corporeitas,
de insensata sensus, et anima, et de non
calida color [calor], non autem
de calido agente; et quoniam agens tunc perfecte producit,
cum
bene materiam disposuerit, affirmandum est, ab eo formam introduci,
propriam
effundente similitudinem. At quoniam corporeitas materialitas
est, ut
in Metaph. probavimus, eamque vident triangulum
fieri, et quadratam et circularem,
cogitant formas quoque activas
esse materiae filias. Nec intelligunt materiam esse
corpus substantiale
per Essentiam, aptum ad recipiendos innumeros terminos
quantitativos
figurasque. Item nec intelligunt, quod ponentes ipsi formam
aeque
ac materiam principium rerum, dum de materiae sinu ipsam educunt,
non principium
ponunt, sed finem et effectum, et non causam
primam. De quibus affirmant quod ex
alterutris non fiant. Quapropter
antequam ulterius progrediar, de anima et animatis
dicere necessarium
arbitror.
Caput IV.
Ex fabricae et origine animalis, animam esse spiritum
tenuem,
calidum, mobilem, aptum pati, proptereaque
sentire.
~
Liquido constat lucem caloremque solis non in aëre gigni,
nec in terra educi de
materiali gremio, sed ab ipso
effundi sole. Praesertim intra frigidam glaciem ex
cuius
latebris oriri, nisi stupidissima affimaret [affirmaret] bestia. Hic calor
sub terram penetrat, et abscendente sole remanet,
disponitque
ipsam in varias formas, ubi liquidam reddit, producit aquas,
oleum,
gummi: ubi indurat, lapides, metalla, etc. ubi attenuat, fumum,
vaporemque et ventum
quorsumlibet mobilem: ubi autem